Yogaretreata Spanias 2022

IMG_4762_edited.jpg

Dáhton:

 

11. 18.06 2022


Gaskkamuttos geassemánu de šaddá yoga Valencia lieggasis, Spanias. Guhtta beaivvi de lea kundalini-, yin- ja ashtangayoga guvttiin sertifiserejuvvon jođiheaddjiin. Retreata lea heivehuvvon easkkaálgiide ja sidjiide geat leat ovdalaččas veaháš yogastallan.

Dáid beivviid čiekŋudat iežamet yoga áhppásmahtti ja vuoiŋŋastahtti dillái. Dan dahkat iešguđetge lágan vuoigŋanvugiiguin, čiekŋalis sojahallamiiguin, geardduheaddji lihkademiiguin, medidatuvššain ja goŋgačuojahemiin.

 

Munno čuorvvassátni lea "illu ja vuoiŋŋasteapmi". Illu buot dan ovddas maid nagadat yogastalladettiin. Illu daid dovdduid ovddas maid yogastallan iđiha, sihke fysálaččat ja mentálalaččat. Illu lieggasa ovddas, borramuša, go beassat vásihit ođđa guovlluid ja oahpásmuvat ođđa olbmuiguin, ja illu go beassat vásihit dán searválagaid earáiguin.

 

Orrun

 


Retreata dollo čáppa Villa Dorotheas mii lea Valencias, Orxeta (Alicante) guovllus Spanias.
 

Oasseváldit diŋgojit ieža ja mákset njuolgga retreataguovddážii orruma ovddas. Haddái gullá idjadeapmi ja golbma boradeami beaivái. Boahtin lea áramusat dii. 1600 lávvardaga ja lanja guođđá maŋimustá dii. 1000 dan beaivvi go vuolgá.


Yoga mákso sierra.

 

 


Idjadeapmi:
Duppallanjain. Ovttaolbmo lanja sáhttá diŋgo ja máksit lasi dan ovddas. Lanjas leat
iđitbivttas ja sihkaldagat. Váldde fárrui sihkaldaga maid anát vuojadanbasseaŋŋas ja
mearragáttis.

 

 


Borran:
Golbma vegetáralaš/vegan borrama beaivái. Nuvttá čáhci ja šattut beaivvi. Teadja ja
káffe iđitborramuššii, muđui ferte oastit. Mállásat dan lávvardat eahkeda go boahtit ja iđitborramuš dan beaivvi go vuolgit. 

Go diŋgot orruma, dieđit jus ležžet makkárge allergiat.

 

 


Guovlu: 
Villa Dorotheas lea vuojadanbasseaŋga mas lea sáltečáhci. Gárdina birra leat čáppa
gilvvagárddit ja dasttánaga vuogas lihkadan vejolašvuođat.

Lea vejolaš diŋgot ofelasti gii mieđušta meahccái dahje várrái. Dán ovddas máksá sierra. Ruvvejeaddji sáhttá maid dáhttut, ja máksit sierra dan ge ovddas. 

 

Wifi gávdno guovllus. Maiddái unna gávppáš mas leat yogabiktasat ja eará unna
dávviraččat. Gávppážis ferte ruđain máksit.

 

 


Haddi orruma ovddas:
735 euro.

 

Orruma diŋgot:
Diŋgo dáppe: info@villa-dorothea.com  Čále dáro-, spánska- dahje eaŋgasgillii. Dieđit maiddái jus ležžet makkárge allergiat.

 


Maŋimus diŋgon ja máksináigi lea cuoŋománu 12. beaivi 2022.

YOGA


 

Vurrolagaid lea kundalini-, yin- ja ashtangayoga miehtá vahku. Tiimmaid juogadeaba  
kundalini jođiheaddji Berit Nystad ja yin- ja ashtanga jođiheaddji Gunvor Guttorm.

 

Mii čoagganat lávvardat eahkeda dii 18.00 vuos boradit, ja de sulii tiimma maŋŋelaš  oahpásmuvvat guđet guimmiideametguin.

 

 


Prográmma:
Sotnabeaivvi- maŋŋebárgga -duorastaga
06.00-0800: Iđityoga
08.00-09.00: Iđitborran
09.00-10.30: Boddu
10.30-13.00: Ovdalgaskabeai-yoga
13.00-14.00: Beaiveborran 
14.00-18.00: Friija
18.00-19.00: Eahketyoga
19.00-20.00: Mállásat

 


Vuossárgga- gaskavahku- bearjadaga
06.00-0800: Iđityoga
08.00-09.00: Iđitborran
09.00-13.00: Friija
13.00-14.00: Beaiveborran
14.00-16.30: Friija
16.30-19.00: Maŋŋágaskabeai-yoga
19.00-20.00: Mállásat


Sáhttá rievdat.

 

Gaskavahku manná maŋŋágaskabeai-yoga ollásit goŋŋastallamii. Goŋŋa šuoŋat dávistit olbmo siskimuššii ja sáhttet gálgat sihke silolaš ja fysálaš čuolmmaid.

 


Haddi yoga ovddas:
*NOK 4 000 ovdal guovvamánu 1. beaivvi
NOK 4 600 maŋŋil guovvamánu 1. beaivvi


*Árramáksu


Dieđiheapmi:

Dieđit maila bokte, berit@davviyoga.no. Čále namat, mobilnummara ja maidadreassat. Dahje deaddil "Dieđit retreatii" duoppe vuollelis.

Go leat dieđihan, de oaččut dieđihandivvaga ovddas rehkega mii lea NOK 500.


Easkka dalle go leat máksán dieđihandivvaga, de lea du dieđiheapmi ollis.
Fuobmá árramávssu mii dahká retreata hálbbibun.

Áigemearri:
Loahppamávssu galggat máksit maŋimustá cuoŋománu 12. beaivvi 2022.

Eret cealkin:
Dieđiheapmi lea geatnegahtti, muhto ii persovnnalaš. Jus dattetge it sáhte
searvat, de sáhtát vuovdit iežat saji muhtun earái. Atte dieđu Davvi Yogai dán birra.

 

Dieđihandiva ii máksojuvvo ruovttoluotta.


Don fertet ieš cealkit eret orruma. Retreataguovddážis leat iežas eavttut ja hattit go cealká eret orruma.


Retreata oažžu ollásit máksojuvvot ruovttoluotta jus das ii šattaš mihkkige.


Eavttut:
Davvi Yogai ii gula orrun ii ge mátki, eai ge leat makkárge geatnegasvuođat dasa.  Davvi Yogas eai ge leat makkárge geatnegasvuođat láhppon gálvvuide, hoteallaorrumii dahje eará goluide mat gártet jus retreata rievdá dahje loahpahuvvo.

Oaččut máksojuvvot olles supmi ruovttoluotta - sihke orruma ja yoga ovddas - jus yogaretreatas ii šatta mihkkige.


Čuovo Covid-19 njuolggadusaid mat gusket Spaniai ja daidda riikkaide maid bokte jođát retreatii. Fuolat ahte dus leat mátkedáhkádus ja mátkebáhpárat sajis.

Mátki:

Mátkki fuolahat ieš. Sihke SAS:s, Norwegianis ja Finnairas leat njuolggogirdimat Alicantii muhtun gávpogiin Norggas, Ruoŧas ja Suomas.
 

Johtima Villa Dorotheai ja Villa Dorotheas mávssát maid ieš. Villa Dorthea sáhttá veahkehit gávdnat buriid ja hálbbes johtinčovdosiid.

 

Yogajođiheaddjit

Gunvor Guttormas lea sertifiserejuvvon ashtangayoga oahppu ja lea váldán lassioahpu ashtanga-rocket ja yinyogas. Son lea yogastallan ieš sullii 15 jagi, ja son jođiha jeavddalaččat yogabottuid, maiddái neahtas.


Yinyoga lea ráfálaš ja terapeutalaš yogavuohki. Yinyoga guhkes vanahallamat addet ráfi sihke rupmašiii ja millii ja heive erenoamáš bures olbmuide geain leat deahkkebákčasat, ja dovdet iežaset leat stirdon, váiban ja álšša ja energiija haga.


Ashtanga lea dynamálaš yogavuohki mas lea dihto lihkadanráidu maid čuovvu go yogastallá, juohke lihkadeapmi lea ráhkkaneapmi nuppi lihkadeapmái. Lihkadeami bokte oahppá fokuseret, vuoigŋat ja iežainis bargat. Yogavuohki heive buohkaide, go dan sáhttá heivehit ovttat yogastallái. Dán retreatas fállat yoga easkkaálgiide ja veaháš hárjánan yogastalliide.


Berit Nystad lea sertifiserejuvvon nuppi dási kundaliniyoga oahpaheaddji. Son lea maiddái sertifiserejuvvon goŋŋačuojaheaddji ja sus leat moanat kundaliniyoga kurssat, earet eará golbma oasi Kundalini Yoga Therapy Professional Trainingas. Biret lea yogastallan badjel 20 jagi ja sus leat jeavddalaččat yogakurssat, maiddái neahta bokte.
 

Kundaliniyoga gohčoduvvo diđolašvuođa yogan. Dát lea dynamálaš reaidu man bokte olmmoš sielus sáhttá vásihit. Kundaliniyoga atná vuoigŋama, mudra, čalbmefokusiid, mantra, rumašlohkaid ja ieš guđet ge lihkastagaid balanseren dihtii rávssáid, nanusmahttit nearvasystema, gievrudahttit geahppáid ja buhtistit vara. Dát balansere rupmaša, miela ja sielu ja addá áhppásmahtti dovddu.


Retreatas váldit buot dáid vugiid atnui, muhto hárjehusat ja hárjehusaid
guhkkodagat leat heivehuvvon easkkaálgiide ja veaháš hárjánan yogastalliide.

Maiddái goŋŋa váldo atnui, sihke vuoiŋŋasteames ja guhkit goŋŋameditašuvnnas.

Giella:
Jođiheamit leat sámegillii ja dárogillii, dárbbu mielde maiddái eaŋgasgillii.

 

Yogaretreata lea rabas buohkaide.  

//:Váimmolaš bures boahtima sávvaba Gunvor ja Biret!

                                            

Gunvor Iškurasas (1)_edited.jpg
_edited_edited.jpg