Yoga Saharas
04. 03. - 11.03. 2027
«Dát ii leat dušše yogamátki, muhto all inclusive mátkevásáhus.»
— Káren-Ann
Vuolgge don ge Marokkoi Sahara sáttoábi litna sáttodieváid jaskatvuhtii gos beasat dikšut rupmaša, miela ja vuoiŋŋa.
Hárjehallamiiguin, meditašuvnnain ja diđolašvuođain láidestuvvot iežat siskáldas máilbmái - ráfi latnjasat.
Veahkkin midjiide lea sáttoábi jaskatvuohta. Mii yogastallat litna sáddus, dušše yogavuloš vuolde. Čohkkát ja veallát ná eatnan alde starggasmahttá olbmo.
Mii álgit seavdnjadin lihkastagaiguin mat boktet rupmaša johtui. Ja de nuortan sáttodieváid duohken badjána iđitbeaivváš min mantračuoŋaide.
Go veiggodišgoahtá, de hástit du fas yogastallat ovdal go velledat liegga sáddui ja divttát iežat vuodjut botnehis ja dálkkodeaddji vuoiŋŋasteapmái.
Min 8 beaivásaš máinnalsmas mátki
Govva: Britt Hansen. Dološ karavána luoddaguoras Ait Ben Haddouas.
1.b.: Bures boahtin Marrakechii
Min vižžet girdišiljus ja dolvot riadii Marrakecha boares gávpogii Medinai. Doppe gávnnadat oahpásmuvvat, boradit ja yogastallat ovdal go nohkkat.
2.b.: Marrakechas Agdz oasisii
Maŋŋá yogastallama ja iđitbiepmu, de lea vuolgga 9 áiggi. Vuodjit Tizi n`Tichka ávžži ja amazigh báikkážiid meattá ja čađa ja bisánastit veahá várdát ja njulget julggiid. Joavdat Ait Ben Haddoui gos boradat. Maŋŋá gaskabeaivvi rastidat Anti-Atlas váriid d ja joavdat Draa leahkái, mii lea Marokko guhkimus leahki. Doppe idjadat Agdz oasisas, pálmmaid vuolde ja cizáš civkimis. Doppe lea maiddái min vuosttas yogastallan, njuolgga eatnan alde dán mátkkis.
3.b.: Agdzas Erg Chigaga sáttodieváide
Vuolgga 9 áiggi, maŋŋá yogastallama ja iđitbiepmu. Dán beaivvi vuodjit Zagora čađa ja bisánat Tamgroutas gos galledat muhtin historjjálaš girjerádjosa ja koranskuvlla, ja fitnat fabrihkás gos ráhkadait dovddus ruoná keramihka. Ja de joavdat M´hamid gávpogii mii lea sáttoábi gáttis. Doppe boradat muhtin bearraša geahčen. Ja de dollet 2-tiibmasaš mátkái meahcceluoddaráiggiid Erg Chigaga sáttodieváid guvlui - iežamet gohttenbáikái golmma beaivái ja njealji idjii. Ovdal go beaivváš luoitáda, de gakcut smávva sáttodievážii yogastallat liegga, litna sáddus.
4.b.: Fitnat vázzimin sáttodieváid alde
Oanehis ja vuogas mátki Erg Chigaga sáttodieváid alde. Oahpisteaddji dolvvoda min.
5.b.: Nomádaeallin & riidet kamelaiguin
Fitnat beaivemohki riidemin kamelaiguin ja oahpásmuvvamin Sahara meahcce-eallimii. Dás oaidnit maiddái mo sáhttá láibut dáid meahcceolbmuid vieru mielde ja giksadit láibbiid njuolgga sáddus.
6.b.: Hávdudeapmi sáddus
Jus beaivvadat ja doarvái liekkas, de beassat hávduduvvot liegga sáddus. Dát lea sáttoábi olbmuid dálkkodeaddji dikšunvuohki gos olmmoš velleda liegga sáttoroggái ja gokčojuvvo liegga sádduin.
7.b.: Erg Chigagas Ouarzazatii
Maŋŋá iđitborrama joatkit iežamet máinnalsmas mátkki máŋgga lágan eatnamiid čađa, earet eará goikan Iriki jávrri alde, ja de Foum Zguid ja Taznakht gávpogiid čađa, maŋit gávpot dovddus amazigh ránuid dihtii. Eahketbeallái joavdat Ouarzazatii gos idjadat muhtin hotelles.
8.b.: Ouarzazates Marrakechii ja girdišilljui
Dát lea min maŋimuš beaivi dán mátkkis. Menara girdišilljui jođedettiin Marrakechii vuodjit fas Tizi n`Tichka ja Tadart bokte, ja leat lohpiduvvon ahte joavdat girdišilljui golbma tiimma ovdal go girdi vuolgá eahkedis.
Govva: Ismail Bouaicha. Agdz oasa.
Govva: Berit Nystad. Várddus geahččat Telouite kasbahs olggos.
Govva: Ismail Bouaicha. Beaivvášluoitádeapmi Erg Chigagas.
Mii lea vuordagis
Govva: Berit Nystad. Sadhana sáttoábis.
Mii yogastallat guktii beaivái, veahá oanehabbot daid beivviid go johtit.
Dát yogadeaivvadeapmi heive sihke easkkaálgiide ja dutnje gii leat hárjánan yogastallat. Davvi Yoga oahpaheaddji Biret heiveha hárjehallamiid nu ahte maiddái don gii it goassige ovdal leat yogastallan, sáhtát fátmmastit juohke lihkastaga, jiena ja vuoiŋŋádeami čiekŋalis fámu. Oahpahuvvo sáme- ja dárogillii. muhto maiddái eaŋgasgillii - jus dárbu.
Arvva luoitit
Šerres nástealmmi rájes guoibmás dollastallamiidda árrangáttis, juohhke čalbmeravkaleapmi leairras lea bovdejupmi guođđit huša ja leat áiddo das, iežainis. Retreahtas geassádat máilbmái gos yoga lea váldo dahkamuš.
Yoga lea eambbo go dušše lihkadit, nu mii álo mediteret maiddái, go dovddastat ahte rumaš, miella ja siellu gullet oktii.
Danne go yoga fátmmasta buot, de sáhttet váivves dovddut badjánit. Ane buorrin go beasat dán vásihit. Don leat buhttisteamen iežat čiekŋaleamos čiegáid.
Beaiveplána
tii 06.00-08.00 Sadhana
tii 08.30 Iđitbiebmu
tii 13.30 Lunša
tii 17.00-18.30 Eahketyoga
tii 19.30 Mállásat
tii 21.00 Dolastallan
DÁRBBAŠLAŠ DIEĐUT
Galle olbmo
Eanemusat 10
Dieđit
Ovdal 28.12. 2026
Máksin
Fertet leat máksán ovdal 04.01. 2027
Hattit
Yoga ovddas:
NOK 4000
Rehket sáddejuvvo maŋŋá go leat dieđihan mátkái
Mátki ja orrun Marokkos:
€ 1 095
€ 370 lassi oktolanja ovddas
Ferte leat mákson ovdal 04.01 2027
€ 1 095 ovddas oaččut:
Vuogas sáhtu
Hárjánan vuoddjiid ja ofelaččaid
Báikkálaš ofelačča Tamgroutas
1 ija Marrakechas guovtteolbmo lanjas
1 ija Agdzas guovtteolbmo lanjas
4 ija vuogas meahcceleairras guovtteolbmo lanjas
1 ija Ouarzazates guovtteolbmo lanjas
Borramuša ja juhkančázi
Lunšša muhtin olbmuid geahčen
Láibut sáttoláibbi
Kamelmátkki
Hávduduvvot sáddus
Musihka dollagáttis
Ii gula haddái:
Girdimátkkit
Yoga
Tips
Ferte leat mákson ovdal 04. 01 2027
Maŋŋá go leat dieđihan mátkái, de mátkefuolaheaddji čállá dutnje mo ja gosa galggat máksit mátkki ovddas.
DIEĐIHAN JA ERETCEALKIN
NJUOLGGADUSAT
Go dieđihat yogamátkái, de dohkkehat čuovvovaš dieđihan ja eretcealkin eavttuid.
Yoga ovddas mávssát 4 000 norgga kruvnna mii maid lea depositum.
Dát mearkkaša: Deposituma, mii lea NOK 4 000, ii leat vejolaš oažžut ruovttoluotta das rájes go leat máksán dan.
Gáhtanlága mielde lea dábálaččat 14 beaivvi gáhtanáigi, muhto dát dávjá ii guoskka astoáiggidoaimmaide maidda lea dáhton jo biddjon, nu go mahká retreahtaide.Easkka go leat máksán, de lea dus sadji retreahtas.
Go cealkkát eret 3 mánu ovdal go yogaretreahta álgá, de mákso ruhta ruovttoluotta, earet NOK 4 000.
Go cealkkát eret 90 – 60 beaivvi ovdal go yogaretreahta álgá, de mákso 50 % ruovttoluotta, earet NOK 4000.
It fidne ruđa ruovttoluotta go cealkkát eret unnit go 60 beaivvi ovdal go yogaretreahta algá.
Jus retreahta heaittihuvvo go leat menddo uhccán oassálastit, dahje mátkefuolaheaddji dahje yogaoahpaheaddji man nu siva dihtii ii sáhte searvat, de mákso olles supmi ruovttoluotta, maiddái NOK 4000.
-
Sáhttá geavvat ahte šaddat earáhuhttit mátkeruvttu áiddo ovdalaš mátkki vuorddekeahtes ja kontrollerekeahtes sivaid dihtii. Dát sáhttá mielddisbuktit ahte šattat loahpahit osiid dahje olles diŋgojuvvon mátkki. Sivat sáhttet leat dálki, luonddu- ja atomaroasut, buollimat, stuimmit, siviila muosehuhttimat, industrijarii čadnon riiddut, terror, soahti dahje soahteáitagat.
Bargoriidu sáhttá leat riidu fálaldagaiguin mat midjiide gusket dahje cuohcat daid fálaldagaide maid mii fállat ja maidda eat nagat fállat eará sadjái. Jus šaddet maŋŋoneamit, rievdadeamit dahje kanseleremat "force majeure" dihtii, de eat guotte ovddasvástádusa das.
-
Davvi Yoga fállá yogaoahpahusa gos yogastalliid dearvvasvuohta lea guovddážis. Lea dattetge juohke yogastalli iežas ovddasvástádus yogastallat dorvvolaš vuogi mielde. Son dat dovdá iežas rumašlaš ja mielalaš veajuid, ja ferte ieš muddet yogastallama dan mielde.
Mii buoremus láhkai heivehat oahpahusa yogastalliid máhtu ja hárjáneami mielde. Lea dehálaš ahte juohkehaš gii searvá, bargá nu mo bagaduvvo, maiddái jus lea dárbu lihkadit eará láhkái - oahpahusas čájehuvvo mo.
Davvi Yoga ii váldde ovddasvástádusa jus oktage roasmmohuvaš yogastaladettiin, ii dalle jus dáhpáhuvvá oahpahusas ii ge jus roasmmohuvaš priváhta dilis go ii leat oahpahusas. Jus olbmos ležžet vigit ja givssit maid ferte vuhtii váldit, de berre dán muitalit yogaoahpaheaddjái yogastallama álggedettiin jo. Gulahala maiddái doaktáriin jus leaččat eahpádusas.
-
Várut ahte dus lea rivttes ja dohkálaš mátkedáhkádus mátkái. Dáhkádus ferte gokčat táhpa, goluid, billašuvvamiid mat bohtet táhpa, lihkoshisvuođa, buozalmasvuođa, jápmima ja medisiinnálaš sivaid geažil, ja maiddái persovnnálaš ovddasvástádusa.
Mii ávžžuhat maiddái du oastit dáhkádusa mii máksá jus láhpát iežat biergasiid, girdit maŋŋonit dahje kanselerejuvvojit, bagáša láhppo dahje láhpát dahje suoládahtat ruđaid.
Buot dáhkádusat leat du iežat ovddasvástádus ja vuordit ahte barggat nu mo čilgejuvvon dás.
-
Fuobmá fal ahte ollu riikkat, rederiiját ja girdisearvvit gáibidit ahte pássa lea dohkálaš gitta 6 mánu maŋŋá go mátki lea nohkan. Mátkkošteaddji ferte maiddái iskat visumnjuolggadusaid su stáhtaboargárgullevašvuođa ektui dan riikkas gos johtá.
Lea mátkkošteaddji geadnegasvuohta váruhit ahte sus ja daid olbmuin geaidda diŋgo mátkki, leat gustovaš pássat, vejolaččat maid visumat, dan beaivvi go lea vuolgga.
-
Jus mátkkošteaddji lea duhtameahttun mainna nu, de ferte dán dakkaviđe dieđihit vuoddjái/ofelažžii, olgomátkki fuolaheaddjái dahje hotelle bargiide. Dat bohtet bargat buot maid nagadežžet njulget dili.
Jo, searvvan áinnas !
Dán dadjet ovddeš oassálastit
Eambbo dieđut
Idjadeapmi
Mii orrut meahcis sáttoábis. Tealttáin leat láhččojuvvon seaŋggat ja čuovga. Oktasaš rišut, hivssegat ja restaurantatealtá gávdnojit leairras.
Borramuš
Yogaretreahtas lea vegetaralaš borramuš ráhkaduvvon marokko vieruid mielde. Fállo maiddái manni dasa guhte sihtá. Johtinbeivviid soaitá maid leat biergu. Dieđit ovdagihtii jus leš mihkkige maid it gierdda borrat.
Biktasat ja biergasat
Váldde mielde biktasiid báhkka beivviid ja čoaska iđđediid várás.
Ávžžuhat váldit mielde ullosuohkuid, liegga yoastallanbuvssaid, asehis olgguldusjáhka dahje buori báiddi čoaska iđđediidda.
Buorit skuovaid; sandálaid ja viehkanskuovaid.
Oaivesuoji nu go gaibagahppira, liinni dahje turbana.
Yogamáhtá, ránu dahje stuorra liinni.
Gállolámppá dahje lupmalámppa.
Čáhci ja buhtisvuohta
Hotelliin ja restauranttain leat oarjemáilmmi hivssegat. Eará sajiin sáhttet leat pedálahivssegat gos ii leat hivssetbábir. Válddes danne mielde hivssetbáhpára dahje intimservieahtaid, vejolaččat maid giehtabuhtistangelea. Spriŋŋačázi it galgga juhkat.
Tipsa
Marokkos lea olmmošvierru attestit “viehkanruđa”, nu guhká go service lea dohkálaš. Danne addit tipssa iežamet ofelaččaide, vuoddjide, kamelvázziide, leairabargiide jna.
Girdit ovdan ruoktot Marokkoi
Norwegian girdá ovdan ruoktot Marrakechii sihke Oslos ja Stockholmmas njukčamánus. Ávžžuhat jámma geahčastallat girdibileahtaid vai fidnet buori haddái.
Lágideaddjit
Davvi Yoga
man Berit Nystad jođiha, kundalini- ja yinyoga oahpaheaddji,goŋŋačuojaheaddji
E-poasta: berit@davviyoga.no
Tel.: +47 954 29 518
Britt Hansen
Lágida Davvi Yogain ja Voyage Désert Marocain yogamátkkiid Marokkoi.
E-poasta: britthansen60@gmail.com
Tel.: +47 913 04 409
Voyage Désert Maroc
Bearašmátkefitnodat man Ismail Bouaicha jođiha. Johtet Saharai ja dan lagas guovlluide Marokkos.
E-mail: ismailbouaicha11@gmail.com