Berit Nystad
Davvi Yoga oamasteaddji
Mun lean Ovllá-Kirstte Biret ja mu yogamátki álggii go orron Oslos. Dalle vuosttas geardde gullen sáni kundalini yoga. Álgen dasa.
In mun dakkaviđe lean nu gesson yoga, muhto juoidá dat lei. Áigi goas bessen leat iežainan - vanahallat, nagadit lihkastagaid, gierddahallat.
Go fas ruoktot fárrejin, de álgen oahpahit yoga, vaikko in lean ge makkár oahpuid vázzán. Mun čuovvolin ávžžuhusa oahpahišgoahtit dan veahá maid máhtten. Čuvvon yogagirjjiid bagadusaid ja čuojahin meditašuvnnaid maid leimmet kopieren nuppi kasseahtas nubbái - lobiheamet, jáhkan mun.
Dál lean kundalini yoga oahpaheaddji 2. dásis, oahppan goŋŋačuojaheaddjin, vázzán buot lágan yogakurssaid, maiddái yin yoga oahpu. Ja issoras giitevaš go beasan didjiide oahpahit.
Gunvor Guttorm
Ovttasbargoguoibmi
Petter-Iŋggá Gunvor lea oahppan ashtanga yoga oahpaheaddjin ja lea váldán lassioahpu rocket ja yin yogas. Son lea yogastallan badjel 20 jagi. Son, nu go ollusat earát ge, fuomášii yoga go rumaš ii šat doaibman nu mo galggai. Geahččalii moatti yogavuogi, muhto maŋáčassii gávnnahii ahte ashtanga yoga heive sutnje buoremusat.
Gunvor lea movttegis ja geasuheaddji olmmoš. Su yogabottuin dovdá olmmoš iežas oadjebassan go son oaidná juohkehačča ja veahkeha nu ahte yogastalli nagada daid váddáseamos lihkastagaid ge.
Gunvor ássá Johkamohkis Ruoŧas. Son jámma oahpaha yoga neahta bokte. Soai leaba Birehiin bargan ovttas máŋggaid jagiid.
Čális jus hálidat Gunvora ságaide yoga birra.
e-poasta: gunvor.guttorm@gmail.com
