Yogastallanvuogit
Muosát ráfi ja nuppástumi min erenoamáš fálaldaga bokte. Davvi Yoga fállá kundaliniyoga, yinyoga ja goŋŋastallama, guhte ge iežas erenoamášvuogaidisguin. Buot dát nannen dihtii du rumalaš ja mielalaš dili.
Kundaliniyoga
Kundaliniyoga lea rievdadahtti yogastallanvuohki mii hástuha ođđa jurddašeapmái ja boktá diđolašvuođa go njeaidá gáržžidusaid maid alcceseamet bidjat. Dat veahkeha beassat eret cieggan oainnus ja nanusmahttá min gamusdovdama dahje intuišuvnna. Kriyaiguin loktet energiijja dási rupmašis vai olahivččiimet allelat diđolašvuhtii, seammás go nannet nearvasystema, dássidat rávssáid, buhttistat vara ja jaskkodahttit miela. Kundaliniyoga gohčoduvvo danne ge diđolašvuođa yogan.
Yogastallat dán vuogi mielde gáibida nana dáhtu go šaddá vuoitit ego badjel mii dáhtošii aivve álki láhkai sattáhallat. Yogastallan dahká ahte sáhttit olahit iežamet duohta siskkimussii ja ahte áddegoađašeimmet manne min siellu lea dán máilmmis.
Dábiid bokte čatnasit miella, rávssát ja nearvasystema oktii. Kundaliniyogain sáhttit rievdadit dáid dábiid vai ealašeimmet eambbo diđolažžan ja duohtan.
Yinyoga
Yinyoga lea sivvadis ja meditatiivalaš yogastallanvuohki man fokus lea buoridit varajođu vanahaladettiin suonaid ja ligameanttaid - fierpmi lađđasiid birra - ja guhkkidettiin rupmaša čatnangođđosa - fascia. Dát váikkuha ja rahpá energiijageainnuid, dahká buori olbmo fysálaš ja mielladillái ja dovdduide.
Fascia lea dego joaibmašuvvan livskobihttá dehkiid ja dávttiid birra. Jus dat ii jámma beasa lihkadit, de stirdu ja bávččastisgoahtá.
Lihkastagat bistet guovttis gitta guđa minuktii, muhtimin gitta 20 minuktii, ja leat erenoamáš buori olbmuide geat leat roasmmohuvvan dahje geain leat bissovaš bákčasat. Yin yogas bargat erenoamážit čoarbeliiguin, gátnasiin ja čilggiin.
Goŋŋastallan
Goŋŋas rigádit erenoamáš vibrašuvnnat mat veahkehit miela mannat čiekŋalis siskkáldas jaskatvuhtii. Goŋŋa jienat leat erenoamážat. Min jierbmi ii nagat áddet daid, ja miella vuollána.
Goŋŋastallamis yogastallat vuos ovttas. Ja de velledit yogastallit láhttái ja dušše leat, dan botta go goŋŋa čuodjá.
Go goŋŋa čuojahuvvo, de bajiduvvo jietna cehkiid mielde gitta bajimussii, vilges jiena - "white sound" - muddui. Dát jietna de sáhttá doalvut olbmo čiekŋalis meditiivválaš dillái ja vuoiŋŋasteapmái. Danne gohčoduvvo ge goŋŋa gievrramus šamanistálaš čuojanassan yogas.
Goŋŋa čuojahuvvo jogo vuoiŋŋasteapmin dahje meditašuvdnan. Sáhttá čuojahuvot dihto áigumušain ja sáhttá čuojahuvvot eaŋkil olbmuide dahje joavkkuide. Goŋŋavuoiŋŋasteamis lea jietna litnásat go goŋŋameditašuvnnas ja soaitá dušše finadit bajimus ceahkis. Lea álo yogastallan vus álggos, ja de velledit yogastallit lláhttái vuoiŋŋastit dan botta go goŋŋá čuodjá.
White sound ii heive áhpehis olbmuide ii ge mánáide mat eai leat vel pubertehtii joavdan.
«Goŋŋa lea sivdnádusa jiena skádja dan álgojienas mii gullui go universa riegádii.»